生死之間奇妙的….”信”

話說當年中二o既時候, 響我中學度有一個類似小型佈道會o既週會, 當台上牧師呼召有無同學決志信主o既時候, 我同隔離位o既同學你眼望我眼, 一齊都舉o左手, 但係就無淚如湧泉o既感動.

不過主一直都無放開……

當決志之後自不然就係成長八課, 我當時都上左一堂, 只係第一堂, 第一堂只係大家各自介紹下, 因為當時好似係小組咁上. 不過我其實都唔知道, 因為除左呢一堂, 我就無再上第二堂. 彷彿神同我打o左個招呼, 做左個點頭朋友, 就各自走開左…….

完 左多年o既中學生活當然就係進入真實o的o既社會生活, 當年小弟讀書都唔需要問政府借錢, 只係靠本科o既工作已經可以賺到學費, 一日返八小時工加八小時學, 看似非人生活. 亦係本科o既興趣令我可以成為一個比賽裡面香港o既代表, 更曾訓練後一兩屆o既代表. 更在後來一o的時日可以接觸到一o的工作範籌內o既世界級頂尖兒, 面對面傾談, 同台食飯.

看似生命一帆風順, 卻響呢o的時候, 工作出現改變, 好一段時間都無工作, 甚至有一段日子要靠朋友接濟左一個月o既開支. 但縱使生活潦倒, 我仍無親近神……

至 於身體方面, 由細到大我都久唔久會無故休克而要十字車送去醫院, 基本上都要阿媽湊. 我可能係一個怪o既基督徒, 當年中二舉手之後, 印象中好似係睇左一兩次創世記同啟示錄, 中間o個o的除左響學校聽, 響街有時見到, 或者出名o的o既聖經故事, 其他詳細都唔知道. 同埋我每次揭聖經黎睇o既時候都係我自己遇到o的大事, 個心唔係好舒服o既時候就會揭揭聖經, 就係會覺得聖經會有o的野可以搵到o既咁樣. 不過印象中都係唔知點解成日都係詩篇箴言之類.

無野做, 無錢, 無健康, 彷彿咩都無, 都好似只係無我自己o既野咁. 響呢個時候, 響一日裡面, 我第一次響工作上比公司炒o既o個一日, 亦都係我阿爸中風入院o既o個一日, 一日裡面無晒我地屋企o既”經濟支柱”, 重要住緊一層未供完亦響短期內見唔到有機會有能力繼續供落去o既可能, 即係連住o既地方都好快會無, 回頭看幸好只係一個小小鍛練, 好快就有可以”退”去住o既地方. 雖然係一個咁艱難o既時候, 但係我仍無親近神……縱然返過一排教會, 都只係響崇拜裡面出現, 彷彿係一個星期日基督徒…….

直到 2009 年11月尾, 我又再休克入院, 今次同以往有o的唔同, 今次個肚有o的痛. 於是醫生就安排一連串檢驗, 檢驗之間, 係惟獨照胃鏡, 成間房裡面o既醫護人員o既面色響我照之前同我照之後係唔同樣, 彷彿好似見到o的唔知咩野咁. 然後, 個負責照胃鏡o個個醫生輕輕帶過:”見到你流血, 幫你止左, 胃同十二指腸”. 禍不單行呢個詞語好似有o的古人智慧似的, 當我返到病房我個主診醫生就話之前照超聲波見到有粒野, 叫我唔好諗咁多住, 過幾個月要再檢查.

前後做左好多測試不過都只係住左兩日一夜, 不過o的測試成日都係o的醫生話有位就去, 我都無諗過可以咁短時間內做晒由內到外o既檢查, 照胃鏡隨時都要排幾個月啦……

以往休克o既經驗都係一兩日後會回復得唔錯, 不過今次有o的唔同, 好一段時間都好虛弱, 發病時段洽巧年尾年頭, 兩年o既所有年假再加埋有病假紙同無病假紙再加埋紅日放假, 足足有成個月.

返到屋企休養期間, 起初都無親近神, 直至有一日睇到一段經文(啟示錄 9:5):

Revelation

9:5

And orders were given them not to put them to death, but to give them great pain for five months: and their pain was as the pain from the wound of a scorpion.

可能會奇怪點解會係英文, 因為呢個係響我響屋企休息中上網響我個 facebook o既某一日路過見到o既經文. 起初覺得無乜特別, 但係個心有o的感覺, 於是走左去睇中文版. 起初都無乜特別.

但係呢段經文響我個腦到有o的縈繞o既時候, 因為我再返醫院檢驗o既時候就係發病後o既五個月, 照胃鏡o既情境彷彿就係一條蠍子尾申入肚內, 而且醫生重用胃鏡幫我用激光止血.

好似好多巧合, 因為我對聖經都只有字面o既認識, 所以一路諗一路諗……

只”舉手”以黎, 一路都無乜恆常禱告, 今次出院之後有一晚我做左個我自己都覺得特別o既禱告, 我只係得一句說話, 我話:”如果係祢, 祢搵人黎嗌我返去呀”.

唔 知係唔係諗住有得賴無人黎搵定係話人係祈福黨就唔使返, 過左一兩日, 諗住無啦, 都無事發生. 但係就係偏偏呢個時候, 上帝奇妙o既工作就發生. 因為初期返到屋企身體非常虛弱, 只能勉勉強強同阿媽去散散步, 唔知係我陪佢定佢陪我. 但係就響散步o既時候, 我未係基督徒o既阿媽輕輕一句:”不如你返返教會啦”. 我當堂打左個突, 我真係無話可說, 雖然我阿媽未係基督徒, 不過佢都會認為有比人更高層次o既”上帝”, 我家住黃大仙, 佢又唔係叫我去拜神求籤, 又唔係祈福黨. 而係我屋內o既人, 彷彿主自己親自黎搵我返去屬於佢o既地方咁, 我已經再無可以諗o既漏動. 只係剩低上帝比我o既感動而已.

之後就重新進入教會生活, 完成我之前只係路過同上帝打過招呼而到左而家, 係真係想認識上帝更多o既成長八課.

回想過黎, 每次入院都係得阿媽成為探訪者, 彷彿上帝一直都在看顧而只係我睇唔到而已. 感謝主一路無走開, 而且係凡尋找祂的必得尋見o既o個一位.

而 到左上浸禮班第一堂, 雖然已經靈修讀經一段時間, 卻響呢一日, 靈修經文竟然係詩篇 146:2 “我一生要讚美耶和華。我還活的時候，要歌頌我的上帝 “, 彷彿就係阿爸帶阿仔返學咁, 一個一生o既吩咐. 感謝主賜我美好o既信, 不單只文字o既書信, 而且係生命o既信心.

願主得著祂自己所當得的榮耀.

阿們.